“Android Erası” müsabiqəsinin açılış tədbiri baş tutdu

“Android erası” müsabiqəsinin 25 dekabr 2011-ci il nəzərdə tutulmuş açılış tədbiri Qafqaz Universitetində baş tutdu. “Hackathon Azerbaijan” lahiyəsinin təşkilatçılığı ilə keçirilən və ”Ready, Steady, Code!” adlanan təqdimat mərasimində təcrübəli ekspertlər və müsabiqədə iştirak haqqı qazanan nominantlar iştirak etdi.

Tədbiri giriş sözü ilə açan təşkilatçı Rəşhad Əliyev müsabiqənin faəliyyət istiqamətindən danışıb, məqsədi, mərhələləri və nəzərdə tutulan hədiyyələr haqqında ətraflı məlumat verdi.

Təcrübəli ekspertlərdən olan Hüseyn Quliyev(UI Architect @ BNP Paribas; CEO @ Optimax Software; PhD, Cardiff University) isə “Proqramlaşdırma-son trendlər” adlı təqdimatını nümayiş etdirdi. Daha sonra sullara cavab verən Hüseyn Quliyev müasir dövrdə kəşf edilən İKT məhsulları ilə dünya bazarına çıxmağın daha asan olduğunu, sadəcə işləyib ortaya nəticə qoymaq gərəkdiyini vurğuladı.

Tədbirdə həmçinin Tural Bədirxanlı (Software Engineer @ Google; Computer Science, MIT) ekspert qismində çıxış etdi. Onun ”Hackathon” prosesi haqqında verdiyi maraqlı məlumatlar və mövzu haqqında nümayiş etdirdiyi video çarxlar tədbirə xüsusi rəng qatdı.

Daha sonra tədbir müsabiqənin təşkilatçılarından Kamran Səmədli, Rəcəb Davudov və Ramin Orucovun əlavə məlumatları və təqdimatları ilə davam etdi. Xüsusi ilə müsabiqənin əsas hədiyyəsi olan “Android” kubokunun təqdimatı iştirakçılar tərəfindən böyük marağa səbəb oldu.

Tədbirin keçirilməsində əsas məqsəd iştirakçılara gələcək fəaliyyətlərində və yarışmada seçiləcək mövzuların seçimində köməklik göstərməkdir. Qeyd edək ki “Android Erası” müsabiqəsi Huawei və Unibankın sponsorluğu ilə təşkil olunur.